माथेरान युवक काँग्रेस अध्यक्ष पदी मंगेश मोरे यांची वर्णी

 माथेरान युवक काँग्रेस अध्यक्ष पदी मंगेश मोरे यांची वर्णी

पाताळगंगा न्युज : अजय कदम 

माथेरान : २४ ऑक्टोबर,

         माथेरानच्या थंड हवेच्या ठिकाणी विधानसभेसाठी गरमागरमीचे वारे वाहू लागले असतानाच काँग्रेसने सुद्धा एक पाऊल पुढे टाकले आहे.येथील कार्यकर्त्याच्या सभेत येथील तरुणामधील आवडते व्यक्तिमत्व,उत्कृष्ट निवेदक मंगेश मोरे यांची एकमताने युवक अध्यक्षपदी वर्णी लागली आहे.

           विधानसभेचे बिगुल वाजल्यानंतर सर्व पक्षांनी मोर्चेबांधणी सुरू केली आहे.काँग्रेसने सुद्धा निवडणुकीच्या पार्श्वभूमीवर पक्ष बांधणीसाठी तयारी सुरू केली आहे.येथील उत्कृष्ट निवेदक आणि तरुणांमध्ये आपली वेगळी छाप पडणारे मंगेश प्रदीप मोरे यांची  आशा कदम यांच्या निवासस्थानी दुपारी १२  वाजता झालेल्या सभेत सर्वानुमते निवड करण्यात आली.कर्जत तालुका अध्यक्ष संजय गवळी यांच्या हस्ते पुष्पगुच्छ देऊन मोरे यांचे स्वागत करण्यात आले.यावेळी ऍडव्होकेट सुरज पंडित,माथेरानचे शहरप्रमुख विजय गजानन कदम,अश्वपाल संघटनेच्या अध्यक्षा आशा कदम,काँग्रेसचे कार्यकर्ते किशोर कासुर्डे,उपस्थित होते.

         यावेळी बोलताना मंगेश मोरे म्हणाले की,पक्षाने माझ्यावर विश्वास ठेवून खूप मोठी जबाबदारी दिली आहे.माथेरान मधील जास्तीत जास्त तरुणांना एकत्र घेऊन माथेरान मधील बेरोजगारी दूर करण्याचा प्रामाणिक प्रयत्न करेन.आज अनेक तरुण हे व्यसनाधिनतेच्या मार्गावर जात आहेत हे माथेरानच्या येणाऱ्या पिढीसाठी खूप घातक आहे.जर तरुणांच्या हाताला काम मिळाले तर ते व्यसनाधिनतेपासून दूर राहून स्वतःच्या पायावर उभे रहातील.